ፊታውራሪ ምዑዝ በየነ ከዚህ ዓለም በሞት ተለዩ

ፊታውራሪው የአጼ ዮሐንስ አራተኛ ቤተሰብ ናቸው!

ፊታውራሪ ክቡር ምዑዝ በየነ ተድላ የፓርላማ የሕግ መምሪያ አባል እና ምክትል ፕሬዚዳንት፣ የሕግ መወሰኛ አባል እና ምክትል አፈ ጉባኤ እንዲሁም የግርማዊ ቀዳማዊ ኀይለሥላሴ ልዩ አማካሪ በመሆን በተለያዩ ኃላፊነቶች ሀገራቸውን ያገለገሉ የሀገር ባለውለታ መሆናቸውን ቤተሰቦቻቸው ለDW ገልፀዋል። ከአባታቸው ደጃዝማች በየነ ተድላ እና ከእናታቸው ወይዘሮ አበባ ሓጎስ በ1911ዓ/ም በቀድሞው የትግራይ ጠቅላይ ግዛት ክልተ አውላዕሎ አውራጃ ወንበርታ ወረዳ የተወለዱት ፊታውራሪ ክቡር ምዑዝ በየነ ተድላ ፤ሀገራቸው ኢትዮጵያን በተለያዩ የአስተዳደር ዘርፎች በታማኝነት አገልግለዋል።

• በ1949 ዓ/ም በያኔው ስማቸው ልጅ ምዑዝ በየነ በምርጫ ተወዳድረው በማሸነፍ የፓርላማ አባል ሆነው ሰርተዋል።

• ከ1950 -1953 ዓ/ም ደግሞ የቀኝአዝማችነት ሹመት አግኝተው አውራጃ ገዢ በመሆን አገልግለዋል።

• በ1960 ዓ/ም የሕግ መወሰኛ አባል ሆነው ተሹመዋል።

ፊታውራሪ ክቡር ምዑዝ የክልተ አውላዕሎ እና የአጋመ አውራጃዎች አስተዳዳሪ ሆነውም ሰርተዋል። የፓርላማ የሕግ መምሪያ አባል እና ምክትል ፕሬዚዳንት የህግ መወሰኛ አባል እና ምክትል አፈ ጉባኤ እንዲሁም የግርማዊ ቀዳማዊ ኀይለሥላሴ ልዩ አማካሪ በመሆን አገልግለዋል። ሐምሌ 25 ቀን 2015 በተወለዱ በ104 ዓመታቸው ከዚህ ዓለም በሞት መለየታቸውን ቤተሰቦቻቸው ለDW ገልፀዋል። የቀብር ሥነ ስርዓታቸውም ብፁዓን ሊቃነ ጳጻሳት እና ከፍተኛ የመንግስት ባለስልጣናት በተገኙበት ዛሬ ሐምሌ 29 ቀን 2015 ዓ/ም በመንበረ ጸባኦት ቅድስት ሥላሴ ካቴድራል ተፈጽሟል።

“ሽበት ከልጅነቴ ነው”